2月23號開咪記

對每一個鍾意電台，鍾意做DJ嘅人嚟講，最開心嘅~莫過於可以坐喺直播室，對住支咪講嘢，等人係大氣電波到聽到自己把聲。

所以，對於可以喺2月23號度開咪嘅我嚟講，感覺真係開心到癲！興奮到喪！但而家回顧番呢件事，咪前咪後~我只有一個感覺，2個字講哂！


Sorry！ 唔係開心，唔係興奮，唔係激high！而係….『火羅』爆！！


事件1 – 曚盛盛
由我著手開始寫rundown到準備開咪，只掛住搵料、度料再搵料，完全唔知要做一份真嘅rundown。要星期六亞絹打嚟催至知咩事！跟住~火速用一個鐘頭打咗一篇所謂嘅『rundown』，搞到亞絹執到死死吓！仲有部死人電腦係咁hang機，搞到我遲咗十分鐘先send到比心急如焚嘅亞絹。Shit！！


事件2 – 九唔搭八
節目一開波，講我地日常生活有咩諺語會用到/講到。我就講咗一句「薑真係愈老愈辣」，之後解釋埋呢一句係咩意思…講吓講吓，開始唔對路！我竟然講咗另一個根本唔係呢句說話嘅意思出嚟！喺呢個時候，KK即刻幫我兜...唉！要怪就怪自己冇做足份rundown，冇寫註解喺後面。Shit！！


事件3 - 炒粉
播歌途中，亞絹同op機嘅靚仔輝哥哥已經講緊一陣仲有幾分鐘時間，可以再傾多陣，但我完全冇意識到呢段說話嘅意思，只係埋首喺度練一陣tag歌要講嘅嘢。好啦好啦…出事喇！我tag完歌之後，包尾仲話『轉頭番嚟~繼續新新青年….』，突然間！全部人將對眼放到幾倍咁大兼呆咗ｏ嘴！


吓？咩事呀？之後op機哥哥又話『得！首歌繼續去啦，唔驚！』

KK就嘆一嘆氣話：『你知唔知你啱啱出咗事呢?』


我仲憨居居食煎堆咁款問咩事！原來啱啱佢地話仲有幾分鐘時間剩，可以講埋先去廣告，但就因為我嗰一句包尾，令到佢地返唔到轉頭…咁嗰幾分鐘時間點算好呢？咪唯有繼續去歌再去廣告囉！唉！我真係一d意識都冇…Shit！！


事件4 - 再炒多鑊粉
每次番嚟節目，我地都會講一句slogan：「頹廢借歪，熱愛be there」。第一句由一個人講，尾嗰句就由另外兩個主持人一齊講。好喇，今次輪到我講頭一句，op機哥哥比咗開得咪嘅signal我之後，我就搶閘話：「頹廢借歪，熱愛…」，KK+亞絹即時呆咗1，2秒，跟住即刻接埋下半句，之後仲笑我做咩咁心急…唉呀！！！ 好『火羅』呀！ 點解我會咁架？真係好想好想即刻想搵窿捐！但…show must go on！ 頂硬上吧！Shit！！


開完咪嗰陣，我極度黯然咁離開，但多得Op機嘅靚仔輝哥哥同Ernest，佢地叫我唔使唔開心，話炒粉好平常，冇乜嘢，只要下次唔好再犯就得~仲叫我比心機！


啱嘅…都過咗去，再講都冇用，放心！我知道點做，THX~！喺過往嗰幾次開咪，我參與度都冇今次咁高，由搵料，度rundown到傾細節，每一個step都好比心機去做，雖然出嚟嘅效果…唔係咁好！但都開心。亦因為今次嘅高度參與，令我更切切實實明白到除咗咪前嘅應變緊要之外，背後嘅功課(rundown)都絕對唔能夠求其是但懶散做！以為寫少一d，搵少一d冇所謂？只要一開咪用到，你要講嘅時候就已經口啞啞。


總括嚟講，今次除咗『火羅』爆直播室之外，都總算獲益良多！


Is a good experience and memory！

新新DJ Bi