11/28/2007

Mixing記#3

已經第三定第四次mix嘢,
其實mac機已經馴服左一半,
聽beat入位大約都知道係咩位,
即係本來今次應該都順順利利,
不過出事位同聖經講魔鬼係一樣,
就係遍地遊行,一定無可能撞唔到!
(大家有無留意上面呢一段嘢係梯型)

今次衰咩?咪就係衰係揀歌度!揀左成個鐘都揀唔到,就係話"勉強無幸福"係無錯!最後結果係,兩首歌太似,而且有一首唔夾段稿而全軍覆沒!看我的,我會再接再厲!!

插曲:
mix嘢時,亞絹搵我錄一段稿。錄稿一向都係我死穴,應該係話講嘢一向都係我死穴,所以我自古都有個別名叫"唔用tongue"啦!今次錄嘢更加發現,原來我連個口都係唔用咖!原來只要郁多少少個口,口部同表情誇張少少,成件事係會唔同曬咖!!

07新新DJ Cow

11/20/2007

「夢‧改變世界」定「世界‧改變夢」

上星期日一早就起身仆入沙田幫手,唔知係咪太早,所以無咩做,一個識嘅人都無 (好彩有個同我一樣準時嘅靚女同我吹下水,無咁悶,hehe,佢就係chirsty啦*v*)

無聊咗一論之後,新新DJ Ceci都嚟埋啦,我地彷彿更無聊,自拍咗一陣…Stage Manger Jerry哥哥唔知係咪感受到我地嘅無聊,就開始同我地briefing啦!因為有人遲到,所以我可以同Ceci一齊做stage,擔起當天對我地嚟講最神聖嘅任務:幫嘉賓徐偉賢(Peco)搬keyboard!唔搬過都唔知,真係好鬼重@@” 唔好睇少我地呢個動作呀,Peco之所以可以咁順利自彈自唱,都係因為我地兩個咋 ^.6

(p.s.呢個動作仲要綵排咖!!!)

綵排之後我地就繼續無聊,同Ceci吹水,我同佢做咗年幾同學,都無咩機會真正咁傾下計,今次都應該係傾得最耐嘅一次……我地係度探討揀U嘅問題,大家都好想讀傳理系,因為我們都有同一個夢想:做DJ,但生命上卻有好多嘅限制><”

因為傳理收生要求好高,為咗入到u,我們不得不改變揀科表上的choice,夢想有時都難免要向現實低頭@@”。傾到呢度,我都不禁問自己一句:「夢‧改變世界」定「世界‧改變夢」!?

兩點半,開show了~有阿絹+快必做MC,嘉賓分別到達,流程相當順利,當然啦,要知道謹慎的阿絹早早就回來踩台(綵排),還獨自跟空氣念唸對白來哩:呵…快必-----(no response~)

我同Ceci負責俾cue同工欣恩安排嘉賓同參加者上台,當然也把握機會同嘉賓影相啦^^”

當日除咗幫手,仲見識咗粉絲團的利害,音波功足以叫爆你耳膜,現場所見女粉絲數目佔了99.9%!但叫起上嚟聲線比男性還要雄壯,連嘉賓唱咩都聽唔到VV”還有更利害的秘密武器:閃爆照相機+圍嘔食蕉姐姐!話說個SHOW未完,粉絲們已開始封鎖stage其一邊出口,食蕉姐姐已立即問我地嘉賓會由哪裡走,我都未答得切,已被粉絲們的叫聲中止咗我地嘅對話,閃光燈不停向stage的出口爆閃,我和Ceci都不禁被閃走……

芝娃娃

11/13/2007

噁心的東西

那是一個繁忙的下午,客人川流不息的在店舖內遊逛,因此我也忙得不可開交。不知怎的,襪子像是黏著一些紙屑或是膠紙諸如此類的東西,弄得我很不舒服。我巴不得馬上脫下鞋子把這東西弄出來,然後...那客人又要東西了!

在推銷的過程中,腳掌不由自主地動,務求把黏黏的感覺舒緩一下,直到那客人又說不要那貨品,我便能騰出時間走到倉內,脫下鞋子看個究竟。

我馬上躲進倉的深處,脫去鞋子,把腳拐過來看,我怔了一怔,那不是紙屑,亦不是膠紙,那是黑團團的,被我踐踏得體無完膚,支離破碎的噁心東西,我嚇得目瞪口呆,驚訝得很,自然反應下,我把腳掌胡亂磋,使勁把那噁心東西甩走,不一會,那噁心東西的手腳慢慢從我腳下掉下。最後我要裝作沒事般,走到外邊拿紙巾,把那恐怖東西的屍骸撿走,恨恨地扔到垃圾箱。

藉著解手的借口,到洗手間去,把脫子扔掉,我委實忍受不了襪子沾了那恐怖東西的液體殘留在我襪子,我恨不得把鞋子一拼扔掉,但那著實不值。

我相信這駭人的經歷將會一輩子硌在我的回憶裏,永不磨滅...你猜到那噁心東西是甚麼嗎?

新新DJ亞便

11/11/2007

我嘅夢想

有唔少人,特別係年青人,開口埋口都講夢想,究竟夢想係咩嚟架呢?夢想又係咪真係得個想字呢?
6歲嗰年,我嘅夢想係做一個數學家,原因係因為我次次嘅數學測驗同考試都攞一百分,因為覺得自己計數叻,所以鍾意數學,因為鍾意數學,所以想做數學家,後來因為我d數學成績愈來愈差,同時愈來愈唔鍾意數學,就慢慢放棄了做數學家呢個所謂嘅夢想了。

9歲嗰年,我嘅夢想係做一個老師,不過我想做老師嘅原因並唔係要春風化雨,而係想搵d得意嘅小朋友做班長,因為總覺得生得得意嘅小朋友件校服上,係應該有個班長章嘅,後來任職教師嘅爸爸話我知,教書好悶,仲好有可能嫁唔出,仲會出好多白頭髮,比佢咁嚇一嚇,我又放棄左做老師呢個所謂嘅夢想了。
呢兩個所謂嘅兒時夢想,究竟算唔算得上係真正嘅夢想,真係一個謎!因為夢想係咁易放棄架咩?8年前,我自己都答唔到呢個問題,因為個時夢想對我黎講,只係一件我想做嘅事,我並無諗過點去實踐,點去將夢變成真……

直到12歲嗰年,我多左一個興趣,就係聽收音機,同時都多咗一個夢想,就係做唱片騎師,原因係我好鍾意講嘢,我好想人地聽我講嘢,而做唱片騎師,就絕對滿足到我呢個慾望喇。嗰時,開始有少少懂性嘅我,明白到一個道理,就係得個想字係咩都唔成事,要達到目的,就要付出努力。不過嗰時我所付出嘅「努力」,都有少少好笑,就係放學準時收聽收音機,背低哂d節目播放時間成為一個人肉電台節目時間表,甚至係打上電台聽吓自己把聲……直到15歲個年,我先為自己的夢想作咗一個比較有建設性嘅貢獻,就係參加咗一個公開嘅唱片騎師招募比賽,呢個比賽簡直係要過5關斬6障,參加嘅朋友嚟自五湖四海,個個身懷絕技,唔好意思,誇張咗少少,不過呢個確實係當年嘅我所見過最大嘅場面,參加過最大型嘅比賽。

好唔容易捱過咗一共歷時4小時嘅筆試同口試,接下嚟嘅就係番屋企等消息,睇吓有無得進入第2回合喇。未見過大場面嘅小妹妹,對自己嘅信心顯然嚴重不足,等咗3日電話都係無消息,係收音機聽到有個評判開名讚我,但跟住嗰4日都係收唔到話我入選嘅電話,我食唔安坐唔定訓唔著……最後,係第8日,喺一個無人嘅洗手間,由左邊數起嘅第4個廁格,我聽到一個話我入選咗嘅留言。三千幾名參賽者中,我成為咗其中一百零一個進入第二回合嘅參賽者!雖然我最後並無入到最後十強,但我已經得到我人生中第一個最大嘅肯定。因為呢個肯定,我更有信心去追我嘅夢,更有決心去實踐我嘅夢。

為了我嘅夢唔係只得個想字,我去電台做了一年多嘅實習,縱使工作係接電話,接待嘉賓,搬搬抬抬,影印,斟水,跟頭跟尾…表面上全部都好似同唱片騎師呢個工作無直接嘅關係,但我卻從中認識咗電台嘅架構,節目嘅流程同運作,同埋同有關工作人員嘅相處之道。除此之外,我更參加咗一個唱片騎師嘅訓練班,想學寫稿,學混音,學操作一切有關嘅儀器,為嘅就係等待一個機會,一個實踐夢想嘅機會。
人活著,只因有夢,人因有夢而美,我喺度希望大家同我一樣唔好放棄自己嘅夢想,繼續追自己嘅夢,並祝願大家有夢想成真嘅一日。

新新DJ Ceci

11/07/2007

節目重溫:20071103

新新全包宴:不費你一分一毫,帶你食貫中西,與你細味食物背後o既深意:

雙扣加底走青加色...係d乜?
同你揭開飲食業術語的神秘面紗~

十萬個食什麼:食得多,問得多,發掘食物冷知識

有口氣點搞好, 點搞好? (想追女仔的人士特別適用 :p)

收聽

11/05/2007

Mixing記#2

相信前回blog已經提及過,Mixing除咗要聽音樂得準,入得準之外,對付mac機亦係一個超級大挑戰。但係,原來那些都只係物理上嘅考驗。因為除咗物理考驗之外,心理上同樣會受到考驗...


話說mix咗3,4個鐘嘅 “十萬個食什麼” segment,臨收工前有一個入位,入極都係好似爭小小,爭咩呢? 唔知!點搞好呢? 唔知!


一向得過且過嘅我今次唔甘心,試完又試,入早小小? 入遲小小? 一搞又唔知搞咗幾耐。最後滿以為成功之際,比亞絹一聽,都係出事...最侮辱嘅係,亞絹只係將入果個位推遲咗百分之唔知幾多秒,成件事smooth曬...


真正體驗"我嘅一小步,係人類嘅一大步"係咩意思!


新新DJ亞Cow

後註: 同學仔快d嚟一齊學mixing啦, 好好玩架!

11/01/2007

點至可以令人信得過你?

最近看到一篇文章, 很有意思, 特在此轉載



***

初初入行做編輯,有些前輩的說話,不知怎的,入心入肺到一個地步,就是想忘記也忘記不了。

有一句來自大學的大師兄。那天他去吳松街的突破中心找人,當時的出版社仍在中心六樓。他沒想到會在那裡找到我,所以一看見我,就捉著我談了半天。他語重心長地跟我說:「不要輕易轉工,這對你的履歷表沒有好處,人家會以為你沒有責任感。」他沒有解釋太多,我也沒有追問太多。

愈跟不同的人合作,就愈覺得責任所包含的,遠遠超過「責任」這兩個字。

責任是信心的源頭。為甚麼你會對一個人產生信心?為甚麼一個人會令人有信得過的感覺?因為責任。你知道他若應承你,就不會馬虎了事,他一定有貨交給你。有了信心,你就安心。

完成責任是一種滿足。有時我們會為日復一日的生活感到迷失,有時糊里糊塗就過了一天。責任有時就像一個錨,把你固定在某個範圍。每天把要完成的東西,寫成一個清單,一項項的做好,看著清單就自然覺得今天沒有白過。雖然這好像是失去了自由,可生命如果沒有了這個錨,就總會遇到不能承受的輕,經歷了很多,卻是空空洞洞。

責任是一份愛。有時看見一些情侶,熱戀時如癡如醉,幾年下來要談婚論嫁,才驚覺一直未預備好。婚姻盟約,本身就是一個責任的承諾,履行這個承諾就是一份擔當,擔當就是放下自己預設的議程,超越自我中心的關注,為更高遠的任務、使命、和人,擺上自己。這份擔當,正是愛的體現,也只有愛,會催促我們踏上未知的未來。

You are what you act. 或許我們早己把「講就天下無敵,做就有心無力」,說得朗朗上口,以為自己懂得這樣說,就算得上有心有力。但責任,從來都不是一個用來聊聊的話題,沒有承擔過,就不能明白責任到底是甚麼。情況就像做group project。討論時可能個個興高采烈,但到真正動手就時,我們才知道誰得過且過,誰有實力有擔當。

但反過來說,不顧一切地承擔太多,卻也不見得是負責任。你我都是有限的人,時間有限能力有限,如果經常下巴輕輕,經常承擔過於自己所能承擔的事,你打算要誰來收拾殘局?負責任,就是要完成到才算得入賬簿。

不過年紀漸大,經歷漸多,有時候,有些責任的確大於我們個人所能承擔,不是我們咬緊牙關就能做到,而且情勢也不容我們選擇,這時,我就想起基督教信仰傳統中,一句用來靜修默想的經文:

Lord Jesus Christ. Have mercy on me.

Pakkin (突破雜誌"U+"總編輯)

引用自:http://pakkin.blogspot.com