Be brave, be different

你幾時開始諗你的夢想？可能好多人同我一樣，就係畢業先嚟諗。

我大學主修中文，到我剩返半年就畢業嗰時，我先至發現從來無諗過自己想做乜！嗰時先開始諗，想入電台或者做傳媒，但我一路都無讀相關的科目，亦沒有做有關傳媒的實習工作，原來我一直只係顧住讀好書，應付一個又一個測驗和考試，卻沒有舖路去接近我的夢想。我感到後悔莫及，但想急起直追都趕不上。畢業之後，因為我沒有跟傳媒有關的經驗或學歴，就算有得interview，都無人肯請。

可是始終要生活，所以我選擇了做一份文職工作。天天朝九晚七，訂水訂文具寫proposal，生活刻板而沉悶，但同時因為有穩定的收入，令我覺得安全而實在。生活令我明白現實是殘酷的，所以當時我當自己飲咗孟婆茶，"goo"一聲將夢想忘記，亦都有諗過遲d儲到錢嗰陣，再去實現夢想。但諗深一層，到我真係有車有樓有仔有女嗰時，我仲可以話追夢就追夢咁任性嗎？

我相信我的故事好多人都經歴過，可能大家都曾經有過夢想，但係有很多原因令我們唔記得咗。當然，如果屋企等你份糧開飯，而你仲要不顧一切咁去追夢，可能太不設實際。不過，如果你有條件去追夢的話，你為何不鼓起勇氣去做呢？

 
  
那是誰　用掉了　我的牙膏　我的鞋和外套　是誰穿走了
那是誰　在我家　大方洗澡　鏡子前他和我　一樣的外表
誰搬進　我的大腦　誰綁住　我的手腳
是DNA　唱我反調　還是我　的命運　不敢自編自導


為何沒有去實現夢想？不是DNA出錯，亦未必單單因為現實環境不容許，而是根本不知道自己的夢想是什麼，因為由細到大，無人會話你知要有夢想，教育制度亦不鼓吹你思考自己的前路，只會著重眼前的考試和分數，更何況你的人生早已被規劃，就是跟著社會的「正途」走，最後變成一式一樣的人，擁有一式一樣的人生。你甘心一世就係咁嗎？ 

人生唔一定係咁咖啦，只要給自己多一點勇氣，你的世界就會變得不一樣。 

最近睇報紙見到一位男生，叫陳志輝，他因為心口有個「勇」字，就實現了好多人諗過但唔敢實現的夢想。 

他是一個孤兒，16歲就租板間房住，早上做水電技工，晚上送pizza。當時晚晚都一個人食飯，住喺附近的人都垂頭扒飯，木無表情，彷彿見到廿年後的自己。於是做咗十年嘢，全家身家只有$6,000，英語只懂說yes和no的他決定豁出去。七年來，他以瞓公園、打工賺旅費方式，浪遊超過20個國家。其中有一次當他喺旅途中用曬d錢，要訓火車站，又無工做嘅時候，有一間唐人餐館的老闆娘收留咗佢，打咗三個月工，包三餐仲有雜物房住。 

點解咁辛苦仲要走出去？他的回答令我很難忘：「人生並唔係只有一條路。我唔識英文，又冇錢，連我咁嘅人都做到，其他人點解唔得？」 

人生不是只有人人都行嘅嗰條路，你可以走屬於你的路，只要你敢。 

絹