粉，是炒硬的。

直播室對我嚟講係一個「令我緊張」嘅地方，但同時，它亦係一個吸引我嘅地方，因為喺呢度咩事都有可能發生。記得從前試過開咪嘅時候，腦海完全放空，令拍檔無所適從；又記得試過支咪未開、未著燈，就已經搶先講嘢（註：直播室用咪「著燈」代表正在收音現場廣播）；仲試過播歌時跟Operator溝通出現誤會，「又炒粉」；要「炒粉」、機會實在太多。（編按：「炒粉」即是出錯）

三月二日，星期六，要做節目。

粉，是炒硬的。

喺「孖咇雙睇」嘅前半部分，同拍檔牛雜傾吓計，講吓佢嘅故仔，既輕鬆又好聽（牛雜今次表現實在太好喇！）；本嚟我都好有信心：「今次實無死啦，應該可以打破炒粉呢個宿命喇啩？」當然，宿命係打破唔到啦！就喺我好有信心嘅時候，腦海突然混亂，開始臨場爆肚，亂咁嚟喇！完全無理會過拍檔，自己想講乜就講乜，足足有幾分鐘嘅時間，牛雜好似隱咗形咁（牛雜：抱歉喇！無俾位你入）。

不論太緊張，定係太有信心，都會換嚟「粉，是炒硬的」呢個後果。要做一個好聽嘅節目，要留心嘅嘢都真係太多喇；自己嘅心情都一定要監控得好嚴謹、又一定要注意節目嘅節奏。每一次都太多嘢可以留心同進步咯！每一次亦都係發現自己嘅旅程。

2010新新DJ亞羊


聽聽亞羊點炒粉吧 :p