作為第一次做100%, 對我嚟講, 係一個挑戰。不過，我真是低估咗佢嘅難度…搵到啱自己嘅料難, 將啲料變成自己想講嘅嘢更難, 再將自己想講嘅嘢變為一份初稿, 已經唔知有幾難...
最記得臨開咪前一個禮拜, 導師亞絹打比我, 好語重心長咁講：「喂, 呀公, 其實你個底牌係咩？擺咁多資料, 其實你想講啲咩??」(依句亞絹問咗我不下十次)
其實嗰下真是驚咗一驚, 因為手頭上有兩份功課趕住交, 又要急住改稿, 心諗：「唔理得咁多, 一口氣咩都做晒先！」之後連續七日, 不停改稿, 不停問自己想講啲咩？自己嘅底牌係咩？不斷咁問自己好多問題, 每日都改稿到凌晨兩三點。不過, 我覺得無呢啲經歷, 又點可以令自己進步, 令自己搵到個靈感呢。
因為份稿出嚟真係好差, 到入咗直播室, 都仍然好緊張。多得亞絹同師姐互相幫手, 出嚟嘅表現都比預期好, 嗰下真是放鬆到唔知點形容。短短一個環節, 好實在地見到自己好多嘅不足, 無論係寫稿、對生活嘅觸覺還是自己嘅體驗, 都有好大嘅進步空間。我要拎多啲經驗, 繼續行我嘅DJ路。
2012年新新DJ亞公
沒有留言:
發佈留言