8/24/2007

八號波的威力!


香港真係一個安穩嘅地方! 唔似日本有地震, 又唔似泰國咁~有海嘯, 就連打風都唔會成日掛八號風球!! 所以...圖中嘅八號風球logo, 喺我印象中亦有一段時間冇喺香港出現過!! 喺打風嘅季節, 大家都會好留意風暴消息, 特別係一班恨打風可以乘機放假嘅打工仔! 所以~八月十號星期五呢日, 對好多打工仔嚟講, 係一個Happy Friday!
仲好記得前幾日開始掛一號風球時, 我公司嘅同事已經好興奮, 仲周不時開住天文台嘅網頁嚟睇下個風嘅最新動向! 之後改掛三號風球時, 佢地已經由興奮轉為亢奮!! 就連經理都一路開住天文台個網, 一路開住收音機嚟update最新消息, 仲一路聽一路口up up咁講: "掛八號...掛八號...個風快d吹嚟香港!!" 哈!! 其中一個同事仲笑住話: "經理! 你而家真係好似中咗六合彩3個字, 等中埋其餘果d拎頭獎咁款!!" 哈哈~
到咗中午一點幾嘅時候, 啱啱食完lunch, 有同事好開心咁話: "天文台個網啱啱公佈咗2:30會掛8號風球呀!" 之後仲即刻執定哂嘢等走tim! 起初我地都唔係好信咖! 因為始終未有聽到真實嘅消息! 點知2點幾果陣, 收音機真係宣佈改掛八號風球!! 我地成班不約而同咁歡呼~哈哈! 而家真係好似中咗六合彩頭獎咁呀! 仲即刻以9秒9嘅速度走人....
到咗今日十七號, 又有一個颱風叫聖帕. 聽講今次呢個風嘅威力好勁, 仲會吹向台灣, 係福建登陸!! 打到呢度, 我喺度到諗: 其實香港同台灣都唔係隔好遠ja, 呢個風威力咁強, 唔知...圖中呢個八號風球logo會唔會再一次出現呢? 哈哈!!

Bi

1 則留言:

me 說...

當年做電台的時候,"有幸"返過幾次打風更,那種打風趕返工的情況不是人人有機會遇過。

還記得當年仍要報交通,那長長的巴士停駛路線,甚麼時間未班船,真是報到斷氣。

雖然辛苦,但卻是一個很好的經驗,不是每個電台人都能遇到的。