1/27/2013

寫稿真係真係要好好記憶力!



我諗每次開咪都應該會有唔同嘅感覺。上次就緊張到爆,今次…就搞到人地「炒粉」(編按:出錯)。不過,經過第一次嘅自我介紹,個人就一定無咁緊張㗎喇,自我感覺良好。雖然今次有d唔順利,但就係咁先好玩。每一次都有唔同,而且又可以考吓自己嘅反應。

今次份稿就真係要多謝阿冰師姐喇!多得佢幫我睇咗好多好多次份,份稿先會可以咁順,內容嘅比重變得更平均。諗返自己一開始果份稿,真係…我都唔知點形容好。好彩果陣我順手打多咗份,再加埋師姐嘅幫忙,加上幾晚嘅時間,最尾終於出咗呢份睇落ok嘅稿喇。

仲有,原來寫稿真係真係要好好記憶力,因為要喺自己個腦袋裏面,不停咁攞d相關嘅故事出嚟,先可以寫到落去。就好似我份稿的主題是有關「知己」,幸好我曾有得到知己嘅鼓勵同幫助,令到我攞到最佳進步獎,真係要多謝佢。所以,寫稿的確好考記憶力。

當然,打多咗一次稿,對份稿嘅要求就梗係多咗,而且開多咗一次咪,的確係無上次咁緊張。仲記得上次我自我介紹,緊張到口都震,出嚟果d係震音嚟!不過今次就已經無再咁緊張喇,可能係心理上面調整到,令自己覺得係同朋友吹緊水,最起碼隻手同個口無再震先。不過就實在太少出聲,攪到我好似唔喺個節目裏面咁。

想知我下次仲會唔會唔太出聲?想知其他新新DJ分享d咩故事?就記得每逢星期六 8點,喺新城知訊台聽我地個節目喇!

2012年新新DJ亞恆




沒有留言: