1/31/2013

我終於完全明白「台上一分鐘,台下十年功」嘅道理。



我終於完全明白「台上一分鐘,台下十年功」嘅道理。

過去12月29日就係我第一次開咪,真係好緊張,就好似個環節嘅生死放喺自己手上。

初初諗稿個陣真係好苦惱,都唔知寫咩好!之後選擇咗個好空泛嘅主題(內心貧窮與富貴),加上冇咩例子去支持,成件事好唔實在。後來我同導師討論一輪我就轉咗題目(講人是非),因為我突然諗起一個好戲劇化嘅故事同是非有關,所以我最後揀咗。

到開咪個日,好似講唔到故事嘅有趣性,反而令我好似講得好悶咁,同我之前所想嘅有好大嘅出入。

今次開咪比起新新DJ第一次登場個次開咪相差好遠!今次由做segment到內容到另一個segment,都要自己一手一腳諗,但係嗰次登場,我就好似受訪者咁,淨係預備自己嘅介紹。

我開始預備嗰陣,都以為好似登場嗰次咁容易,但原來唔係咁簡單,我要諗我嘅題目同聽眾有咩關係,點樣可以講一d聽眾鐘意嘅題目,寫segment個陣點樣可以容易令人明白我想講d咩主題。

不過今次令我明白「台上一分鐘,台下十年功」嘅道理,預備嗰陣唔係只係幾分鐘嘅事,當中要面對比人彈稿嘅挫敗,不停改稿,我足足預備咗兩星期有多,先得十分鐘嘅節目,仲要靠其他工作人員幫忙錄segment,做一個環節真係唔簡單。

2012年新新DJ Anna



沒有留言: